Ved starten av skuleåret byrja fem nye lærlingar i Departementa sin tryggings- og serviceorganisasjon (DSS).
Lærlingane skal gjennomføre eit toårig opplæringsløp i tryggingsfaget, med mål om å ta fagbrev.
– Vi har svært gode erfaringar med lærlingeordninga, og er glade for å kunne ønskje eit nytt kull velkomen. Lærlingane er ein viktig del av miljøet vårt, og vi er stolte over å ha dei i verksemda, seier Torgeir Strøm, direktør i DSS.
Ein spennande kvardag ventar
Lærlingane som skal ta fagbrev, vert fordelte på ulike vaktlag og tek del i operativ turnus som tryggingsvakter. Dei vert ein del av den daglege drifta saman med dei erfarne vaktene i DSS, og utfører dei same oppgåvene som dei vil møte i kvardagen, samstundes som dei vert førebudde til fagprøva. Opplæringa skjer i samarbeid med rettleiarar og vaktleiarar, og byggjer på to år med vidaregåande opplæring.
– Kvar lærling får ein eigen rettleiar på laget som følgjer dei tett opp i arbeidskvardagen og under tenesta, seier lærlingekoordinator Christian Ottesen i DSS. Dette sikrar at dei får naudsynt rettleiing, støtte og fagleg utvikling. Etter kvart som dei vert tryggare, vil dei gradvis få meir sjølvstendig ansvar og utfordringar tilpassa nivået deira. Målet er at lærlingane skal utvikle både praktiske ferdigheiter og gode haldningar, og på den måten bli best mogleg rusta til fagprøva, seier han.
Langsiktig lærlingesatsing i DSS
Lærlingordninga i DSS har vore aktiv sidan 2017, og årets kull er det niande i rekkja. DSS har no totalt ni lærlingar i tryggingsfaget. Fire lærlingar var alt i gang, og seks fullførte læretida si tidlegare i år.
Lærlingverksemda i DSS skjer i samarbeid med OK stat.